6 طرق عشان تضغط على نفسك لو بتتمرن لوحدك (1)

6 طرق عشان تضغط على نفسك لو بتتمرن لوحدك (1)

سواء هدفك تعمل كتلة عضلية أو تخسس وتنشف، لازم تضغط على نفسك. لو معاك حد يساعدك، هتزود وزن وتبتدى تعد وهو معاك طيب لو ما فيش حد معاك تعمل ايه يابطل؟

فى 6 حاجات ممكن تعملها عشان تضغط على نفسك وانت بتتمرن لوحدك:

1- أول حاجة التكرارات بالقوة فى التمارين الفردية:

لو بتلعب تمرين بايد واحدة أو رجل واحدة (بالدامبل – بالكابل – على جهاز) هتجيب اخرك فى العدد. بعدين هتساعد بسيط بالايد التانية أو الرجل التانية لحد ما تجيب اخرك تانى وهكذا مع الايد التانية.

2- تانى حاجة التكرارات السلبية فى التمارين الفردية:

التكرارات السلبية ليها تأثير عظيم على زيادة القوة وزيادة حجم العضلة. لكن فى مشكلة واحدة إن التكرارات السلبية أصلاً تمرين يتلعب باتنين عشان بتستخدم وزن اعلى من الوزن اللى بتجيب بيه عده واحدة.تعملها ازاى لوحدك يا بطل؟ بسيطة هتشيل الوزن فى الجزء الموجب من العدة بإيديك أو رجليك الاتنين وفى الجزء السالب من التكرار هتستعمل واحدة بس.

مش ممكن طبعاً تعمل الكلام ده بوزن حر سواء بار او دمبل، هتلعبه على جهاز أو على البار السميث. هنلعب مثلاً بينش على السميث الاول هتحسب أقصى وزن تقدر ترفعه بايد واحدة تكرار واحد بس. بعدها هتزود عليه 20 %. بعد كدة هتمسك البار عادى كانك هتلعب بالايدين بعدين وانت نازل هتنزل بايد واحدة بس فى 3-5 ثانية والايد التانية فى جنبك وترفع بالايدين الاتنين وتنزل تانى بس بالايد التانية وتكرر 5 – 8 تكرار لكل ايد.

3- تالت حاجة الوقوف – الراحة:

الطريقة دى بتستعملها لما تحب تجيب تكرارات كتير 10 – 20 عن طريق انك تجيب اخرك فى العدد بعدين ترجع البار أو الدامبل مكانه تاخد راحة 10 – 15 ثانية وترجع تعد تانى. مثلاً لو عايز تضخم هتجيب اخرك وبعدين تريح 15 ثانية وتعد تانى لحد ما تجيب اخرك. لو هدفك تزود قوتك والتحمل هتلعب بوزن تجيب بيه 3 – 5 عدات وبعدين تريح 10-15 ثانية وتعد تانى ده هيخليك تعمل اكتر من 3 – 5 عدات اللى انت عايزهم.

تابعونا عشان نقول لكم 4 و 5 و6 يا أبطال

الجزء (2)>

 

basem