سلسلة الاحماض الامينية المتشعبة BCAA



مشوفتش قبل كده وانت بتتمرن في الجيم واحد قاعد بيشرب في حاجة أصفرة او أحمرة وقولت في سرك ايه البتاع ده؟ 😀
لو سألته هيقولك ده BCAA
يعني ايه بقي BCAA’S وبتعمل ايه دي؟
………………
الـ BCAA’S هي مجموعة متكونة من 3 أحماض أمينية أساسية هي:
Leucine
Isoleucine
Valine
و ليه هما أساسيين؟ …….
عشان الجسم مش بيصنعهم, يعني لازم تجيبهم من الأكل او المكملات.
و عملية الـ Metabolization للـ BCAA’S بتحصل في العضلات أساسياً مش زي باقي الأحماض الأمينية في الكبد وهما علي بعضهم بيكونوا حوالي 35% من كل الألياف العضلية.
الـ BCAA’S بتدعم عملية البناء في العضلات و في نفس الوقت بتقلل الهدم.
الـ BCAA’S من الحاجات اللي بتقلل احساس الإرهاق والتعب وانت بتتمرن لتأثيرها علي مستوى الناقلات العصبية (Neurotransmitters ) الـ Dopamine و الـ norepinephrine اللي بيها هتقدر انك تتمرن بمجهود أعلى.
الـ BCAA’S بيحصلها Oxidization لإنتاج الطاقة ودي تعتبر خيار ممتاز ليك جداً لو انت بتتمرن الصبح وانت مش واكل او ماشي علي الـ Intermittent fasting
كمان في أبحاث أظهرت ان عملية أكسدة الـ BCAA’S بتزود الـ lipolysis (اطلاق الدهون المتخزنة) و أكسدتها لإنتاج الطاقة عن طريق خلايا الـ Mitochondria

تعالوا بقي نتكلم علي كل واحد من ال 3, وهنبدأ الاول بسعادة الملك : Leucine 😀

* الـ Leucine هو أهم حمض في الـ 3 ,هو المفتاح اللي بيدور العربية, و في الحالة دي العربية هي الألياف والخلايا العضلية, وبيدورها عن طريق انه بيحفز عملية تصنيع البروتين (Protein Synthesis) بانه بينشط مركب مهم جداً موجود في الخلايا العضلية هو الـmTOR اللي بينشط تخليق بروتين العضلات وده هيأدي الي النمو العضلي في الآخر.
كل ما في عملية تصنيع للبروتين في عضلاتك شغالة كل ما هيبقى في نمو عضلي باستمرار ودي أهم نقطة الـ Leucine بيعملها واللي تهمك جداً جداً كرياضي اياً كان هدفك ايه بقى.

* نيجي بقى لتاني حمض اللي هو الـ Isoleucine
الـ Isoleucine بينشط في الجسم مستقبلات اسمها PPAR او (Peroxisome Proliferator-Activated Receptors), PPAR أسهل صح؟ 😀 , الـ PPAR دي بتزود نشاط حرق الدهون في الجسم وبتقلل تخزين الدهون في الخلايا.
الـ Isoleucine كمان بيساعد في تكوين الهيموجلوبين وتكوين جلطات علي الجروح المفتوحة.

* تالت واحد هو الـ Valine
وانت بتتمرن تمرين عالي الشدة سواء بتجري او بتشيل حديد أياً كان نوع الرياضة اللي بتمارسها ايه, المخ بيسحب كميات عالية من حمض الـ Tryptophan ويحوله لـ Serotonin وده بالبلدي كده زي بيدي اشارة للمخ ان الجسم مفرهد خلاص 😀 , فـ التحمل العضلي بيقل عندك.
الـ Valine بقى بيقلل كمية الـ Tryptophan المتجهة للمخ فـ تحول الـ Tryptophan بيقل والتحمل العضلي عندك بيبقى أزيد عن قبل كده.
وعشان كده أحسن اوقات الـ BCAA’S بتتاخد فيها هي قبل أو أثناء التمرين.

لو حابين نجمع فوائد الـ BCAA’S في نقط بسيطة كده نقدر نقول انها :
* بتزود تصنيع وتخزين البروتين في العضلات.
* بتزود التحمل العضلي.
* بتدعم عملية حرق الدهون.
* بتقلل الهدم في العضلات وبتزود عملية البناء.
* بتقلل إحساس التعب في التمرين.

تقدر تاخد الـ BCAA’S ايا كان هدفك ايه, تزيد عضلات او تخس دهون, واحسن وقت لاستخدامهم هو زي ماقولنا وانت بتتمرن او قبل التمرين.